Fyrirlestur: Félagsleg og tónlistarleg áhrif Kvæðamannafélagsins Iðunnar

Við viljum benda á fróðlegan fyrirlestur:

——-

Föstudaginn 11. janúar verður Dr. Ragnheiður Ólafsdóttir með hádegisfyrirlestur í tónlistardeild Listaháskóla Íslands.

Fyrirlesturinn er byggður á doktorsritgerð Ragnheiðar og fjallar um félagsleg og tónlistarleg áhrif Kvæðamannafélagsins Iðunnar á rímnahefðina. Kvæðamannafélagið Iðunn var stofnað í Reykjavík 1929, ári áður en Alþingishátíðin var haldin á Þingvöllum. Getum er leitt að því að stofnun Iðunnar hafi komið til vegna áhrifa umræðna í dagblöðum og manna á meðal um væntanlega Alþingishátíð, en einnig vegna þess að  landsbyggðarfólkinu sem stóð að Iðunni hafi þótt kveðskaparhefðin mikilvægur hluti af því að vera Íslendingur og viljað hefja kveðskap til vegs og virðingar í borgarsamfélagi samtímans. Stofnfélagar Iðunnar voru allflestir aðfluttir, margir úr Vestur-Húnavatnssýslu og þar á meðal fjögur systkin sem voru mjög áhrifamikil innan félagsins. Iðunn skipti kveðskaparhefðinni í tvennt, vísur og rímnalög. Nefnd starfaði fyrir hvort efni um sig, en hafði ólíku að sinna. Vísnanefndin safnaði öllum vísum sem félagar létu frá sér, meðan rímnalaganefndin sá um að ‘bjarga’ þeim rímnalögum sem félagarnir kunnu. Vísnagerð var álitin sjálfsögð og voru félagar hvattir til að yrkja, en þeir sem vildu leika sér með rímnalögin fengu á baukinn, sérstaklega þeir sem vildu kveða við undirleik hljóðfæra. Til grundvallar tónlistarhluta rannsóknarinnar liggja bók Kvæðamannafélagsins, Silfurplötur Iðunnar (2004) og rímnakaflinn í Íslenzkum þjóðlögum (1906-1909) eftir Bjarna Þorsteinsson, þessar tvær aðalheimildir um stemmur sem til eru á prenti. Fjallað verður um þann mun sem er á bókunum tveimur og helstu niðurstöður rannsóknarinnar.

Ragnheiður Ólafsdóttir lauk doktorsnámi frá Australian National University í Canberra 2011 með ritgerðinni Deep Freeze: The Social and Musical Impact of the Iðunn Society on the Icelandic Rímur. Ragnheiður fæddist í Borgarnesi 1960, lauk prófi frá tónmenntakennaradeild Kennaraháskóla Íslands og kenndi og stjórnaði kórum á Íslandi til 1997. Fór þá til Noregs, lagði stund á tónlistarfræði og þjóðlagasöng við Háskólann í Osló og flutti þaðan til Ástralíu 2001, eftir að hafa rekið endahnútinn á langa samvinnu við Þórarin Hjartarson um skáldið Pál Ólafsson, með útgáfu hljómdisksins Söngur riddarans. Ragnheiður býr nú í Hong Kong og starfar sjálfstætt við tónlist og rannsóknir. Grein eftir hana um rímnahefðina birtist í Yearbook for Traditional Music, 2008.

Fyrirlesturinn er haldinn í Sölvhóli, tónleikasal tónlistardeildar að Sölvhólsgötu 13 og hefst kl. 12:30. Allir eru velkomnir.

Þessi færsla var birt undir Auglýsingar. Bókamerkja beinan tengil.

Skildu eftir svar