Vorfundur 10. maí

Skrifað þann 9. 05 2013 - hoskibui

Næsti félagsfundur Iðunnar verður haldinn föstudaginn 10. maí

Að venju er fjölbreytt dagskrá á fundinum, en þetta er síðasti félagsfundur þessa vetrar. Rósa Þorsteinsdóttir segir frá verkefni Árnastofnunar: Handritin alla leið heim, og í því sambandi frá rímnahandritinu Staðarhólsbók rímna, sem fór í Dalina. Hver veit nema kveðið verði uppúr handritinu. Þá ætlar Þorsteinn Magni að kveða á fundinum nokkrar góðar stemmur. Bára Grímsdóttir hyggst svo kveða vísur upp úr vísnabók sem var í eigu móður hennar.

Svo má nefna fasta dagskrárliði: skýrsla ritara, litla hagyrðingamótið, samkveðskap, kaffi og auðvitað gert að afla Skáldu.

Allir fundir og kvæðalagaæfingar félagsins hefjast stundvíslega kl 20:00 og lýkur kl 22:30. Félagar eru hvattir til að mæta á sem flesta fundi og ekki gleyma æfingunum því þar geta menn kynnst betur innviðum félagsins og sögu. Einnig eru félagar hvattir til að taka með sér gesti, bæði á fundi og æfingar, því fundir Iðunnar eru öllum opnir.

Starfsemi félagsins fer fram í Gerðubergi sjá kort á ja.is

Þessi færsla er flokkuð undir Auglýsingar | Skilgreint sem | Athugasemdir

Funi – Útgáfutónleikar 13. maí 2013

Skrifað þann 7. 05 2013 - Kvæðamannafélagið Iðunn

Funi – Útgáfutónleikar 13. maí 2013
í Menningarmiðstöðinni Gerðubergi

kl. 20.00

Aðgangseyrir 1000 kr.

Flúr er nýr hljómdiskur frá dúettinum Funa sem kom út 2. apríl og inniheldur
lítt þekkta, gullfallega, íslenska þjóðlagatónlist. Á útgáfutónleikunum flytja
þau Bára Grímsdóttir og Chris Foster lög af Flúr, en þau skipa Funa. Með þeim
koma einnig fram Birgir Bragason sem leikur á kontrabassa, Lárus Halldór
Grímsson á klarinett, Andri Eyvindsson á saxafón, og söngvararnir Hafsteinn
Þórólfsson og Sólrún Lilja Pálsdóttir.

Bára og Chris syngja bæði og auk þess leikur Bára á finnskt kantele, en Chris
spilar á gamla íslenska hljóðfærið langspi, enskt hammer
dulcimer og á gítar, sem er þó stilltur öðruvísi en venjulegt er.

Á diskinum Flúr er að finna nokkur ný lög eftir Báru Grímsdóttur sem fæst hafa
verið hljóðrituð til útgáfu fyrr. Meirihlutinn eru þó kvæðalög, tvísöngslög og
sálmalög sem fundist hafa í ýmsum gömlum heimildum og eru flutt í útsetningum
Báru og Chris. Textarnir eru bæði nýir og gamlir, allt frá þjóðkvæðum og sálmum
frá 16. öld til kvæða eftir Grím Lárusson frá Grímstungu, föður Báru. Umgjörð
disksins er vönduð og með honum fylgir 32 bls. bæklingur á íslensku og ensku.

Þessi færsla er flokkuð undir Auglýsingar | Athugasemdir

Óðfræðifélagið Boðn: Stofnfundur og málþing föstudag 3. maí

Skrifað þann 30. 04 2013 - Kvæðamannafélagið Iðunn

Undirbúningsnefnd fyrir stofnun félags um rannsóknir á kveðskap sem lagt er
til að nefnt verði *Óðfræðifélagið Boðn* boðar til stofnfundar og málþings
sem haldið er í félagi við Bókmennta- og listfræðistofnun Háskóla Íslands
og Málvísindastofnun Háskóla Íslands föstudaginn 3. maí kl 13:00 – 17:30 í
félagsheimili Ásatrúarfélagsins, Síðumúla 15.

Dagskrá

Lesa meira →

Þessi færsla er flokkuð undir Auglýsingar | Skilgreint sem | Athugasemdir

Dúllaradagur á Prikinu, Bankastræti 12

Skrifað þann 18. 04 2013 - Kvæðamannafélagið Iðunn
Laugardaginn 20. apríl 2013, kl. 16 – 18 verður dagskrá á Prikinu, Bankastræti 12 í Reykjavík helguð minningu Guðmundar dúllara á 100 ára dánardægri hans.
Dagskráin er haldin á vegum Dúllarafélagsins, sem er félagsskapur áhugamanna um verk og minningu Guðmundar Árnasonar dúllara.
Erindi og innlegg:
Einar Árnason hagfræðingur
Þórarinn Eldjárn rithöfundur
Sigurður Sigurðsson dýralæknir
Smári Ólason tónlistarmaður
Þórólfur Árnason verkfræðingur
Kynnir er Guðlaug Elísabet Ólafsdóttir leikkona
Guðmundur Árnason f. 7. júlí 1833, d. 20. apríl 1913 var þekktur fyrir dúllið, þar sem hann sönglaði eða söng lög með all sérstæðum hætti. Hann lét eftir sig nokkur rit þar sem hann segir frá ævi sinni og „reisum“ sínum um landið. Þekktur er kafli í ævisögu Árna prófasts Þórarinssonar þar sem hann segir frá föðurbróður sínum Guðmundi.
Guðmundur dúllari fjármagnaði að hluta byggingu Bankastrætis 12, þar sem Prikið er nú til húsa. Það ræður staðsetningu þessa viðburðar.
Þessi færsla er flokkuð undir Auglýsingar | Skilgreint sem | Athugasemdir

Kvæðamenn kveða vísur Gísla Ólafssonar

Skrifað þann 16. 04 2013 - Kvæðamannafélagið Iðunn

Ingimar Halldórsson og Arnþór Helgason

Á síðasta félagsfundi var að venju skemmtileg dagskrá.

Eitt af því sem gladdi eyru viðstaddra var kveðskapur Ingimars Halldórssonar annars vegar og hins vegar kveðskapur Ingimars og Arnþórs Helgasonar, en þeir þóttu kveða einstaklega vel, enda góðir kvæðamenn.

Þær vísur sem kveðnar voru, eru úr smiðju Gísla Ólafssonar (1885–1967) kvæðamanns og skálds frá Eiríksstöðum í Svartárdal í Austur-Húnavatnssýslu. Áður en þeir félagar kváðu, fór Kristján Eiríksson með tölu um Gísla.

Gísli var afar snjall hagyrðingur og komu út eftir hann þessar ljóðabækur: Ljóð (1917), Nokkrar stökur (1924), Ljóð 1929, Heiman úr dölum (1933), Á brotnandi bárum (1944). Sú bók var endurprentun fyrri bóka hans ásamt nýjum ljóðum. Inngangsorð fyrir þeirri bók skrifaði Jón Pálmason. Síðasta ljóðabók Gísla var Í landvari (1960) og skrifaði Rósberg G. Snædal formála fyrir henni.

Hér fyrir neðan má hlusta á kveðskapinn, en einnig lesa þær vísur sem fluttar voru.

Lesa meira →

Þessi færsla er flokkuð undir Fróðleikur | Skilgreint sem , , | Athugasemdir

Flúr, nýr geisladiskur frá Funa

Skrifað þann 2. 04 2013 - Kvæðamannafélagið Iðunn

Út er kominn nýr diskur frá þjóðlagadúettinum Funa, sem samanstendur af Iðunnarfélögum, þeim Báru Grímsdóttur og Chris Foster.  Diskurinn ber nafnið Flúr og er  til sölu í Smekkleysu á Laugavegi 35 og hjá Báru og Chris í síma 6942644.

Á diskinum eru flutt þekkt þjóðlög, kvæðalög auk nýrra laga sem samin eru af Báru.

Þess skal getið að hætt hefur verið við áður auglýsta útgáfutónleika sem halda átti á fimmtudaginn næsta, 4. apríl  í Gerðubergi. Ný dagsetning verður auglýst síðar.

Þessi færsla er flokkuð undir Auglýsingar | Skilgreint sem , | Athugasemdir

Félagsfundur og kvæðalagaæfing

Skrifað þann 1. 04 2013 - Kvæðamannafélagið Iðunn

Næsti fundur Iðunnar verður haldinn föstudaginn 5. apríl og að vanda verður kvæðalagaæfing miðvikudagskvöldið á undan, sem nú er þann 3. apríl

Að venju er fjölbreytt dagskrá á félagsfundinum og nefna má að Kristján Eiríksson mun halda tölu um Gísla Ólafsson kvæðamann og skáld frá Eiríksstöðum. Þá mun Ragnheiður Ólafsdóttir segja frá Doktorsritgerð sinni, sem fjallar um Kvæðamannafélagið Iðunni og mun leggja sérstaka áherslu á kvæðamennskuna. Ingimar Halldórsson mun kveða nokkrar vísur og þjóðlagadúettinn Funi flytja tóndæmi af nýjum diski sínum Flúr, en Iðunnarfélagarnir Bára Grímsdóttir og Chris Foster skipa þann skemmtilega dúett.

Svo má nefna fasta dagskrárliði: skýrsla ritara, litla hagyrðingamótið, samkveðskap, kaffi og auðvitað gert að afla Skáldu.

Allir fundir og kvæðalagaæfingar félagsins hefjast stundvíslega kl 20:00 og lýkur kl 22:30. Félagar eru hvattir til að mæta á sem flesta fundi og ekki gleyma æfingunum því þar geta menn kynnst betur innviðum félagsins og sögu. Einnig eru félagar hvattir til að taka með sér gesti, bæði á fundi og æfingar, því fundir Iðunnar eru öllum opnir.

Starfsemi félagsins fer fram í Gerðubergi sjá kort á ja.is

Þessi færsla er flokkuð undir Auglýsingar | Skilgreint sem , | Athugasemdir

Meðan stakan mótast létt…

Skrifað þann 17. 03 2013 - Kvæðamannafélagið Iðunn

Sigmundur Benediktsson Iðunnarfélagi var að gefa út vísnabók, við skulum gefa honum orðið:

Til að vaki tungan rétt
tjáning spaka þekki.
Meðan stakan mótast létt
málið sakar ekki.

Sjaldan er ein báran stök, segir máltækið. Hækkandi aldur rekur á eftir mér að koma því í verk, sem ég hefði átt að vera búinn að fyrir löngu.  Á síðasta ári gaf ég út vísnabók 144 bls. með 333 hringhendum og dýrt kveðnum vísum, sem heitir ,,Þegar vísan verður til…” og seldist hún ágætlega, sem gaf ástæðu til að  gera betur. Fáein eintök eru þó enn til af henni.

Seinni vísnabók mín ,, Meðan stakan mótast létt…” er komin út, hún er 240 bls. að stærð og inniheldur um 870 vísur, þar af um 340 dýrt kveðnar. Þessi bók er mun fjölbreyttari en sú fyrri, með 12 vísnaköflum um mismunandi efni og svo rímuna Vorfögnuð. Í bókinni eru sýnishorn af yrkingum um hin ýmsu málefni allt frá hátíðleik- og heimspeki til kersknis- og kátínu. Einnig er þarna að finna ferðavísur, sem og stökur frá leik og starfi með Kvæðamannafélaginu Iðunni í í 20 ár. ,, Meðan stakan mótast létt…”   má segja að sé bók flestra bragarhátta og er von mín að með lestri hennar muni flestir finna eitthvað við sitt hæfi, sem á annað borð hafa gaman af vísum.

Lesa meira →

Þessi færsla er flokkuð undir Auglýsingar | Skilgreint sem , | Athugasemdir

Landsmót kvæðamanna á Siglufirði 2013

Skrifað þann 14. 03 2013 - Kvæðamannafélagið Iðunn

Helgina 1-3. mars síðastliðinn var haldið landsmót kvæðamanna á Siglufirði og reyndist það sögulegt, en þar voru stofnuð samtök kvæðamanna – Stemma.
Gefum formanni nýju samtakanna, Guðrúnu Ingimundardóttur orðið:

Kvæðamannafélagið Ríma á Siglufirði stýrði mótinu og fór öll dagskráin fram í glæsilegum húskynnum Rauðku ehf. Á landsmótinu komu saman fulltrúar fjögurra kvæðamannafélaga: Iðunnar í Reykjavík, Gefjunar á Akureyri, Árgala á Selfossi og Rímu á Siglufirði. Einnig var á Landsmótinu formaður Félags ljóðaunnenda á Austurlandi. Hjá því félagi er áhugi fyrir kveðskaparhefðinni mikill, en ekki er starfandi kvæðamannafélag á Austfjörðum. Til stendur að kvæðamenn Rímu heimsæki Félag ljóðaunnenda á vordögum til að kenna og kynna kveðskap.

Þegar kvæðamenn koma saman er mikið kveðið enda eru kvæðamenn samrýmdur hópur fólks með ástríðu fyrir þessari aldagömlu tónlistar- og kvæðahefð. Mótið hófst formlega í Bláahúsinu þar sem hugmyndir um markmið og starfsreglur Landssamtaka kvæðamanna voru viðraðar. Síðan færðist samkoman yfir á veitingastaðinn Hannes Boy, þar sem mikið var kveðið og borðaður ljúffengur matur. Tónleikar með Steindóri Andersen kvæðamanni voru á Kaffi Rauðku um kvöldið. Steindór kvað hluta úr Ljóðabréfi Jóns Jónssonar og Formannavísur úr Skagafirði eftir Sigurð Stefánsson.

Lesa meira →

Þessi færsla er flokkuð undir Fréttir | Skilgreint sem , | Athugasemdir

Litla hagyrðingamótið, þann 8. mars

Skrifað þann 12. 03 2013 - Kvæðamannafélagið Iðunn

Á fundi Iðunnar þann 8. mars síðastliðinn var að venju haldið hið svokallaða Litla hagyrðingamót.

Hagyrðingar á palli voru Ingi Heiðmar Jónsson,  Sigurður Sigurðarson og Steindór Andersen.

Yrkisefni voru: þeir – þær – þau.

Allir mættu og Ingi Heiðmar hafði að auki vísur frá Jóa í Stapa sem þykir sjálfkjörinn varamaður eða aukamaður þegar færi gefst.

Hér má hlusta á hagyrðingamótið, en einnig má lesa það hér fyrir neðan:

 

Ingi Heiðmar flutti:

Jói í Stapa orti:

Hann
Hann var fyrr af guði gerður
gladdur af englahjörðinni.
Taldist til þess vera verður
að veita umsjá jörðinni.             JG

Hún
Hún hlaut seinna af hérvist kynni
hlaðin seim til fjölgunar
en efnisnotkun öllu minni
af einu rifi sköpuð var.             JG

Lesa meira →

Þessi færsla er flokkuð undir Fróðleikur | Skilgreint sem , | Athugasemdir